Asiya İnkişaf Bankı (ADB) Azərbaycanın Mərkəzi Asiya və Avropa arasında enerji və nəqliyyat ticarəti üzrə strateji regional mərkəzə çevrilməsi üçün ölkə ilə əməkdaşlıq edəcək. SİA ADB-nin hesabatına istinadən xəbər verir ki, bankın 2025-2029-cu illər üçün tərəfdaşlıq strategiyası Azərbaycanla əməkdaşlığın əsas istiqamətlərini müəyyən edəcək. Bank yeni iş yerlərinin yaradılması, investisiyaların cəlb edilməsi və innovativ həllərin tətbiqi sahəsində özəl sektora dəstəyi davam etdirəcək.
“Bu, qeyri-dövlət sektoru üçün yeni maliyyə məhsullarının təklif edilməsini və mikro, kiçik və orta müəssisələrin dəstəklənməsini əhatə edəcək. İnklüziv artımı təşviq etmək üçün ADB səylərini regionların inkişafına və qadınlar və həssas əhali qrupları üçün üstünlüklərin təmin edilməsinə yönəldəcək. ADB və Azərbaycan birlikdə ölkənin və onun vətəndaşlarının maraqları naminə yüksək nəticələrə nail olmağa çalışacaq”, – hesabatda qeyd olunub.
2024-cü ildə ADB Azərbaycana 223,06 milyonABŞ dolları məbləğində kredit ayırıb ki, bunun 131,5 milyon ABŞ dolları suveren kreditlər, 91,56 milyon ABŞ dolları isə qeyri-suveren kreditlərdir. Ötən il texniki yardımın məbləği 3,63 milyon ABŞ dolları təşkil edib. Bütün öhdəliklərin ümumi məbləği 226,9 milyon ABŞ dollarına çatıb.
31 dekabr 2024-cü il tarixinə ADB-nin Azərbaycanın özəl sektorunda ödənilməmiş qalıq və öhdəliklərin ümumi həcmi 143,29 milyon ABŞ dolları təşkil edib ki, bu da bankın özəl sektor portfelinin 1,11 %-nə bərabərdir.
“ADB özəl sektorun inkişafında Azərbaycanın əsas tərəfdaş olaraq qalır, günəş enerjisi sahəsində layihələri, kənd təsərrüfatında əlavə dəyər zəncirlərinin yaradılmasını və bank sektoru vasitəsilə maliyyə xidmətlərinə çıxışın genişləndirilməsini dəstəkləyir. Bank bu yaxınlarda Ticarətin Maliyyələşdirilməsi Proqramına iki əlavə kommersiya bankını daxil edib və kiçik və orta müəssisələrin maliyyələşdirilməsini davam etdirib”, – hesabatda vurğulanıb.
2024-cü ilin sonuna ADB-nin suveren və qeyri-suveren kreditləri üzrə Azərbaycanın ödənişlərinin ümumi həcmi 4,07 milyard ABŞ dolları təşkil edib. Bu vəsaitlər adi və güzəştli kapital resursları hesabına ayrılıb.
Həmin tarixə ADB Azərbaycan üçün dövlət sektorunda ümumi məbləği 4,357 milyardABŞ dolları olan 71 əməliyyatı (kreditlər, qrantlar, zəmanətlər və texniki yardım) təsdiq edib. Cari dövlət portfeli 613,68 milyon ABŞ dolları məbləğində iki krediti və bir dövlət zəmanətini əhatə edir.
