Vyetnam hökuməti ölkədə ailələrdə uşaqların sayını ikidən çox olmamaqla məhdudlaşdıran siyasəti ləğv edib. SİA xəbər verir ki, bu barədə “Bloomberg” məlumat yayıb. Nəşr yazır ki, buna səbəb ölkədə doğumun azalmasının qarşısını almaqdır. Qeyd olunub ki, ölkənin aşağı düşən doğum nisbəti gələcək iqtisadi artım üçün təhdid yaradır və demoqrafik böhrana səbəb ola bilər. Agentliyin məlumatına görə, Vyetnam hakimiyyəti indi cütlüklərə uşaqların sayını və nə vaxt dünyaya gətirəcəklərini sərbəst şəkildə müəyyən etmək imkanı verib.
Qeyd edək ki, əvvəllər yerli qanunvericilik yalnız xüsusi hallar istisna olmaqla, hər ailəyə bir və ya iki uşaq sahibi olmağa icazə verirdi. Bu məhdudiyyət 1988-ci ildə – ümumi doğum nisbətinin hər qadına 4-dən çox uşaq olduğu dövrdə tətbiq edilmişdi.
