“1918-ci il mayın 28-də Azərbaycan Xalq Cümhuriyyətinin Milli Şurası İstiqlal Bəyannaməsini imzalamaqla Azərbaycanın müstəqilliyini dünyaya bəyan etmiş, xalqımızın çoxəsrlik dövlətçilik ənənələrini davam etdirmişdir. Qısa dövr ərzində Azərbaycanın ilk parlamenti, hökuməti yaradılmış, dövlət atributları təsis olunmuş, sərhədləri müəyyən edilmiş, dövlət quruculuğu sahəsində mühüm tədbirlər həyata keçirilmiş, Cümhuriyyətin beynəlxalq münasibətlər sisteminin subyekti kimi tanınması, diplomatik müstəvidə milli maraqların qorunması istiqamətində mühüm addımlar atılmışdır. Yeni fəaliyyətə başlamış parlamentin qəbul etdiyi qanunlar milli müstəqilliyin möhkəmləndirilməsində, ölkədə siyasi, iqtisadi və mədəni inkişafın təmin olunmasında, demokratik prinsiplərin təsbit edilməsində əsaslı rol oynamışdır. Cəmi 23 ay mövcud olmuş Azərbaycan Xalq Cümhuriyyəti müsəlman Şərqində demokratiya ənənələrinin formalaşmasına əhəmiyyətli təsir göstərmişdir”. Bu sözləri SİA-ya açıqlamasında deputat Şahin Seyidzadə deyib.
Şahin Seyidzadə sözlərinə belə davam edib: “Ulu Öndər Heydər Əliyev dediyi kimi: “Müstəqilliyi qorumaq, saxlamaq o müstəqilliyi əldə etməkdən qat-qat çətin bir vəzifə idi.” XX əsrin sonlarında müstəqilliyinə yenidən qovuşan Azərbaycan Ulu Öndər Heydər Əliyevin siyasi iradəsi və fədakarlığı sayəsində dövlətçiliyini qorumağı bacardı. Mühüm siyasi-iqtisadi çətinliklər, daxili münaqişələr və Ermənistandan gələn təcavüz fonunda xalqın təkidi ilə hakimiyyətə qayıdan Ulu Öndər, suverenliyimizi müdafiə edəcək və möhkəmləndirəcək islahatların müəllifi oldu. Ulu Öndərin Naxçıvan Muxtar Respublikasının Ali Məclisinin sessiyasında 1990-cı il noyabrın 17-də – üçrəngli bayrağımızı rəsmi dövlət bayrağı kimi qaldırması dövlətçilik irsinə bağlılığın nümunəsi oldu. 1991-ci il oktyabrın 18-də “Azərbaycan Respublikasının dövlət müstəqilliyi haqqında” Konstitusiya Aktı qəbul olunmuşdur. Konstitusiya Aktında 1918-ci il 28 may tarixli İstiqlal Bəyannaməsinə və “Azərbaycan Respublikasının dövlət müstəqilliyini bərpa etmək haqqında” Azərbaycan Respublikası Ali Sovetinin 1991-ci il 30 avqust tarixli Bəyannaməsinə istinad olunmuş, Azərbaycan Respublikasının Azərbaycan Xalq Cümhuriyyətinin varisi olduğu təsbit edilmişdir. Beləliklə, “Azərbaycan Respublikasının dövlət müstəqilliyi haqqında” Konstitusiya Aktına əsasən Azərbaycan xalqı 1991-ci il oktyabrın 18-də öz müstəqilliyini bərpa etmişdir.
Ulu Öndər Heydər Əliyevin siyasi kursunu uğurla davam etdirən Prezident İlham Əliyev müasir Azərbaycanı təhlükəsiz, sabit və sürətlə inkişaf edən dövlətə çevirdi. Bu gün Prezident İlham Əliyevin rəhbərliyi ilə ölkəmizdə demokratik, hüquqi, dünyəvi dövlət, vətəndaş cəmiyyəti quruculuğu prosesi, siyasi, iqtisadi və sosial islahatlar uğurla həyata keçirilir. İqtisadiyyatın şaxələndirilməsi, infrastruktur layihələrinin reallaşması, əhalinin sosial müdafiəsinin gücləndirilməsi üçün əsaslı tədbirlər görülür. Milli maraqların təmin olunması siyasəti nəticəsində işğaldan azad edilmiş torpaqlarda Azərbaycanın üçrəngli bayrağı dalğalanır.
Prezident İlham Əliyev 2021-ci il oktyabrın 18-də Azərbaycan Respublikasının müstəqilliyinin bərpa edilməsinin 30 ili tamam olmasını, Azərbaycan xalqı 1991-ci ildən sonra ilk dəfə bu bayramı tam fərqli olaraq, öz ərazi bütövlüyünü bərpa etmiş qalib xalq kimi qeyd etməsini, bu baxımdan dövlətçilik tariximizdə müstəsna əhəmiyyətli mərhələlərin, xüsusən müstəqilliyin əldə edilməsi və bərpası kimi tarixi günlərin onların mahiyyəti və məzmununa uyğun daha dəqiq ifadə olunması böyük önəm kəsb ediərək, Azərbaycan Respublikasının Milli Məclisi 1918-ci il mayın 28-də İstiqlal Bəyannaməsi ilə Azərbaycan Respublikasının dövlət müstəqilliyinin elan olunduğunu, 1991-ci il oktyabrın 18-də isə “Azərbaycan Respublikasının dövlət müstəqilliyi haqqında” Konstitusiya Aktı ilə Azərbaycan Respublikasının dövlət müstəqilliyinin bərpa olunduğunu nəzərə alaraq, Mayın 28-i Müstəqillik Günü və Oktyabrın 18-i Müstəqilliyin Bərpası Günü hər il bayram günləri kimi qeyd edilməsi haqqında qanun imzalamışdır.
2007-ci il mayın 25-də isə Bakının İstiqlaliyyət küçəsində açılmış İstiqlal bəyannaməsi abidəsinin rəsmi açılış mərasimində Prezident İlham Əliyev iştirak etmiş, Cümhuriyyətin yubileyləri – 90 və 100 illik – münasibətilə sərəncamlar imzalamışdır. 2018-ci il “Azərbaycan Xalq Cümhuriyyəti İli” elan edilərək, milli yaddaşın formalaşması prosesində dövlətçilik ənənələrinə verilən önəm göstərilmiş, “Azərbaycan Xalq Cümhuriyyətinin 100 illiyi (1918–2018)” yubiley medalı təsis olunmuşdur.
Ötən illər ərzində atılmış hər bir addım və qəbul olunmuş hər bir qərar doğma Azərbaycan torpaqlarının işğaldan azad olunmasına xidmət edib. Prezident İlham Əliyevin Müzəffər Ali Baş Komandan kimi gərgin əməyinin nəticəsində Azərbaycan ərazi bütövlüyünə qovuşdu, xalqımız dünyada mübariz, döyüşkən və müzəffər xalq kimi tanınıldı. Bütün istiqamətlərdə qazanılan uğurların, əldə edilən nailiyyətlərin bir hədəfi var idi – işğal altında olan torpaqlarımızın düşməndən azad edilməsi və Azərbaycanın bütün sərhədləri boyunca bayrağımızın dalğalanması. Bu müqəddəs amal uğrunda əldə edilən zəfər, yalnız hərbi sahədə deyil, diplomatik, iqtisadi və informasiya cəbhələrində də aparılan sistemli və məqsədyönlü fəaliyyətin nəticəsi idi. Azərbaycan dövlətinin milli maraqlara əsaslanan qətiyyətli siyasəti, beynəlxalq aləmdə ədalətin bərqərar olması üçün göstərilən ardıcıl səylər və xalqla ordu arasında yaranmış misilsiz birliyin gücü sayəsində Qarabağ zəfəri reallığa çevrildi. Bu gün azad edilmiş ərazilərdə həyata keçirilən genişmiqyaslı bərpa və quruculuq işləri ölkəmizin gücünün, iradəsinin və gələcəyə olan böyük inamının bariz nümunəsidir”.
Ayşən Vəli
