…Əvvəllər Rusiya Kənd Təsərrüfatı Nazirliyinin inzibati departamentinə rəhbərlik etmiş Oleq Donskix 12 il ədliyyədən gizlənib və cinayət təqibindən yayınmaq üçün saxta vəsiqələrdən istifadə edib.
SİA-nın məlumatına görə, bu barədə cinayət işinin materiallarında bildirilir.
Keçmiş məmur 2 milyard rubldan çox oğurluqda iştirak ittihamı ilə federal axtarışda olub.
Gizləndiyi zaman onun heç bir rəsmi gəlir mənbəyi olmayıb. 2024-cü ilin iyununda o, Moskva vilayətinin İstra rayonunda saxlanılıb. İstintaq materiallarına görə, Donskix cinayət fəaliyyətinin doqquz epizodunda görünür.
Rusiya Federasiyası Cinayət Məcəlləsinin 159-cu maddəsinin 4-cü hissəsi (xüsusilə külli miqdarda dələduzluq) ilə cinayət işi açılıb, cəzası 10 ilədək azadlıqdan məhrumetməni nəzərdə tutur.
İstintaq hesab edir ki, 2007-2008-ci illərdə Donskix Lipetsk vilayətinin sahibkarları ilə birlikdə ASC Rosselxozbank tərəfindən verilmiş külli miqdarda kreditləri, habelə Rosaqrolizinqdən aqrar-sənaye obyektlərinin, o cümlədən içki zavodu, süd zavodu və taxıl zavodunun tikintisi üçün nəzərdə tutulmuş vəsaitləri oğurlayıb.
Donskixin silahdaşları, “Mezhregiontorg+” və “Lipetskagrotekhservis” şirkətlərinə rəhbərlik edən Sergey Burdovski və İqor Konyaxin hələ 2012-ci ildə həbs ediliblər. 2017-ci ildə məhkəmə onları müvafiq olaraq doqquz və on bir il yarım müddətinə azadlıqdan məhrum edib.
Əli Babayev
