Londonun mərkəzində velosiped sürən insanların sayı iki il ərzində 50 faizdən çox artıb. Bu, yeni velosiped yolları və stansiyasız velosiped kirayəsi sayəsində baş verib. Maliyyə rayonunda havanın keyfiyyəti də xeyli yaxşılaşıb. SİA xəbər verir ki, rəsmi məlumatlara görə, 2022-ci ildəki 89 min nəfər ilə müqayisədə 2024-cü ilin oktyabr ayında şəhərin əsas maliyyə rayonu olan Londonun tarixi mərkəzi – Kvadrat Mili boyunca hər gün 139 min insan velosiped sürüb.
“Reuters” agentliyinə görə, küçələrdə gün ərzində velosipedlər təxminən iki dəfə avtomobillərdən çoxdur.
Velosiped idmanının populyarlığının artması 2022-ci ildən avtonəqliyyat vasitələrinin hərəkətində 5 faiz azalma və regionda havanın keyfiyyətinin yaxşılaşması ilə üst-üstə düşdü: azot dioksid üzrə hədəf göstəricilərinin həddindən artıq yüksək olduğu yerlərin sayı 2019-cu ildəki 15-dən 2024-cü ildə ikiyə enib.
2003-cü ildən Londonda nəqliyyatın hərəkətinin azalması məqsədi ilə şəhərin mərkəzinə giriş ödənişi tətbiq edilir. Şəhərdə havanın keyfiyyəti son illərdə ümumiyyətlə yaxşılaşıb, bu, ətraf mühiti ən çox çirkləndirən nəqliyyat vasitələrindən ödəniş alan ultraaşağı emissiya zonası sayəsində baş verib.
Yeni yollar və marşrutlar, həmçinin şəhərdə istifadəsi 2022-ci ildən dörd dəfə artan stansiyasız velosiped kirayə sxemləri velosiped sürənləri həvəsləndirib. İndi şəhər küçələrində hər altı velosipeddən biri “Lime” və “Forest”dir.
