“Financial Times” mənbələrə istinadən yazır ki, NATO-nun baş katibi Mark Rutte ABŞ-a planlaşdırılan səfəri zamanı Vaşinqtonu Ukraynanı Rusiya ilə müharibəni nizamlamaq üçün razılığa gəlməyə onun iradəsinə qarşı məcbur etməməyə çağıracaq.
SİA-nın məlumatına görə, Ruttenin səfəri aprelin 24-25-nə planlaşdırılıb.
Alyansın mətbuat xidmətinin məlumatına görə, baş katibin ABŞ dövlət katibi Marko Rubio, Pentaqonun rəhbəri Pit Heqset və Ağ Evin milli təhlükəsizlik üzrə müşaviri Mayk Vals ilə danışıqları planlaşdırılır.
Ruttenin Vaşinqtona səfəri əsasən iyunda keçiriləcək NATO sammitinə hazırlıqla bağlı olacaq.
Bununla belə, “Financial Times” -nin yazdığı kimi, NATO-nun baş katibi ABŞ prezidenti Donald Trampın yaxın ətrafı ilə görüşlərdən istifadə edərək bəyan edəcək ki, “Vladimir Putinə yaraşan ədalətsiz sülh nizamlanması Avropa üçün təhlükəni artıracaq. Əsas problem amerikalılara təhlükənin nə olduğunu başa düşməkdir”.
Rutte həmçinin “müdafiə yükünün” ABŞ-dan Avropaya ötürülməsini ən yaxşı şəkildə necə əlaqələndirməyi müzakirə etməyi planlaşdırır.
Əli Babayev
