“Azərbaycan və İran arasındakı münasibətləri birmənalı şəkildə qiymətləndirmək çətindir, çünki bu münasibətlər özü birmənalı deyil. Hətta demək olar ki, İran hakimiyyətinin siyasi elitasının bir hissəsi Azərbaycanla sanki problemli münasibətlər saxlayır. Digər bir hissəsi isə əməkdaşlıq və anlaşmanı önə çəkir, münasibətlərin inkişafında maraqlıdır”. Bu sözləri SİA-ya açıqlamasında hüquqşunas, siyasətçi Əli Mustafa deyib.
Onun sözlərinə görə, xüsusilə Prezident Məsud Pezeşkiyanın həm Azərbaycana, həm də Türkiyəyə münasibəti, müşahidələrə əsasən, müsbətdir və o, qarşılıqlı əməkdaşlığa önəm verir: “Lakin təəssüf ki, onun ətrafındakı bəzi şəxslərin Azərbaycana münasibəti dostyana xarakter daşımır. Bu xüsusilə İranın Rusiya ilə sıx əməkdaşlığı və Ermənistanla olan yaxın münasibətləri fonunda daha aydın görünür. Təbii ki, bu halda biz İrandan gözlədiyimiz və haqq etdiyimiz münasibəti görə bilmirik.
Dünyada baş verən proseslər olduqca sürətlə dəyişir: bəzən gərginlik artır, bəzən müvəqqəti yumşalmalar müşahidə olunur. Hazırda isə İranın ətrafında ciddi gərginliklər yaşanır. Xüsusilə İsrail və ABŞ ilə münasibətlərində ciddi qarşıdurmalar mövcuddur. Belə bir şəraitdə İranın Azərbaycan və Türkiyəyə münasibətində müəyyən dəyişikliklərin baş verdiyi hiss olunur. Bu da onunla bağlıdır ki, İran artıq anlayır: üzərinə böyük regional və qlobal problemləri çəkdiyi bir vaxtda, qonşu ölkələrlə, o cümlədən Azərbaycanla münasibətləri gərginləşdirmək onun maraqlarına uyğun deyil.
Siyasətçi qeyd edir ki, bu baxımdan İran Prezidentinin Azərbaycan Prezidenti ilə münasibətləri, onun müşavirinin Azərbaycana səfəri və apreldə gözlənilən rəsmi səfər kimi məlumatlar onu göstərir ki, ən azı Prezident Pezeşkiyan Azərbaycanla münasibətlərin dərinləşməsində və sabit əməkdaşlıq mühitinin yaradılmasında maraqlıdır: “Azərbaycan isə hər zaman İranla dostluq və mehriban qonşuluq münasibətlərində maraqlı olub. Xüsusilə nəzərə alsaq ki, İranda 50 milyona yaxın azərbaycanlı soydaşlarımız yaşayır, bu münasibətlərin normal və qarşılıqlı faydalı olması bizim üçün strateji əhəmiyyət daşıyır. Bu gün də Azərbaycan dövləti İranla əməkdaşlığı və qonşuluq münasibətlərini davam etdirməkdə maraqlıdır. Azərbaycan da bu münasibətlərə adekvat reaksiya verir”.
