Ötən gün Almaniya prezidenti Frank-Valter Ştaynmayer Azərbaycana rəsmi səfər etdi və səfər çərçivəsində Azərbaycan Respublikasının prezidenti cənab İlham Əliyevlə həm təkbətək, həm də heyətlərarası geniştərkibli görüşlər baş tutdu. Bu görüşlərsən sonra hər iki prezidentin keçirdikləri mətbuat konfransı və verdikləri açıqlamalar əlbəttə ki, bu gün həm ölkənin, həm də dünyanın gündəmindədir. Bu çox əhəmiyyətli bir səfər idi. Səfər, bu günkü dünya şərtləri çərçivəsində iki ölkə arasında siyasi, iqtisadi, diplomatik müstəvidə həyata keçirilən təmasların gələcək inkişaf perspektivlərin, atılacaq addımların müzakirəsi poliqonuna çevrilmiş oldu.
Görüşlərdən sonra mətbuat konfransında prezident cənab İlham Əliyevin söylədiyi fikirlər, əlbəttə ki, həm Azərbaycan-Almaniya münasibətlərinin, həm də bölgənin və dünyanın siyasi inkişafının və siyasi, iqtisadi sahədə atılması zəruri addımların yol xəritəsinə çevrilmiş oldu. Cənab prezident münasibətlərimizin uğurlu inkişafından danışaraq, xüsusilə iqtisadi sahədə əldə edilən nailiyyətləri, gələcək planları qeyd erətdi. Eyni zamanda ölkəmizdə keçirilən COP-29 çərçivəsində müzakirə edilən məsələlərin ölkələrarası əlqələrin inkişafı baxımından hər iki tərəfin mövqeyinə uyğun gəldiyini söylədi. Prezident İlham Əliyev dəyişən dünya düzəni çərçivəsində xüsusilə Amerika-Avropa ittifaqı, Rusiya- Qərb münasibətlərində gözəçarpan gərginliklər haqqında danışaraq, bu gərginliklərin ölkələarası münasibətlərə zərər gətirməməsi üçün birlikdə səylərin artırılmalı olduğunu qeyd etdi, gələcək perspektivlər barədə fikir mübadiləsi aparıldı. Cənab prezident eyni zamanda ədalətimizdən, hüququmuzdan danışdı, illərdən bəri həlli bəzi maraqlı güclər tərəfindən məqdədli şəkildə yubadılan, nəhayət Azərbaycanın öz imkanları və qəti qərarları ilə həllini tapmış olan münaqişə haqqında söz etdi, nünaqişənin həllinin qalıcı olmasının, sülh müqaviləsinin imzalanmasının əhəmiyyətindən danışdı.
Həm Azərbaycanın, həm də Ermənistanın sülh müqaviləsinin bağlanması prosesinə çox yaxınlaşdığını bəyan etdi, bir daha Almaniya ilə ölkəmiz arasındakl münasibətlərə uğurlar dilədi. Almaniya prezidenti də çıxışında Azərbaycanla Almaniya arasındakl tarixi münasibətlərə toxundu, bir zamanlar Azərbaycana köç etmiş olan alman əsilli vətəndaşlar, ölkəmizdə mövcud olan mədəniyyət, tolerantlıq ənənələri haqqında danışdı, ölkələrimiz arasında iqtisadi, siyasi sahədə münasibətlərin müsbət xətlə inkişaf etdirilməsi əzmində olduqlarını bəyan etdi.
Ümumilikdə düşünürük ki, bu səfər və səfər çərçivəsində keçirilən görüşlər, aparılan fikir mübadilələri, verilən açıqlamalar bu günkü Azərbaycan-Almaniya münasibətləri ilə yanaşı, həm də müasir dünya şərtləri, dəyişən dünya mənzərəsi çərçivəsində çox əhəmiyyətli məqamları özündə ehtiva edirdi. Cənab Prezidentin də söylədiyi kimi, biz sülhü sadəcə ölkəmiz üçün istəmirik, gələcək dünyamızın sabitliyi, stabilliyi, davamlı inkişafı üçün çalışırıq. Bu fikirlər Almaniya prezidentinin də açıqlamalarında yer alırdı. Ümumiyyətlə görüşün ana xətti bu nikbin və konstruktiv fikir ətrafında qurulmuşdu. Bütün bunları rəhbər tutaraq, Almaniya prezidentinin Azərbaycana səfərini və keçirilən görüşləri çox uğurlu olaraq qiymətləndirə bilərik.
Jalə Əliyeva
Millət vəkili
Milli Məclisin Ailə, qadın, uşaq məsələləri
komitəsinin sədr müavini
