“Azərbaycan–Almaniya əlaqələrinin tarixi çox qədəmdir. 200 il bundan əvvəl yaradılan iqtisadi əlaqələr bu gün yüksələn xətt üzrə inkişaf edir. Azərbaycan əməkdaşlığın möhkəmləndiriliməsində, münasibətlərin yaxşılaşdırılmasında, Avropanın ən inkişaf etmiş ölkələrindən biri kimi Almaniya ilə tərəfdaşlığı dostluq və beynəlxalq normalar çərçivəsində davam etdirməkdə maraqlıdır”. Bu sözləri SİA-ya verdiyi açıqlamasında Milli Məclisin Aqrar Siyasət Komitəsinin sədri, millət vəkili Tahir Rzayev deyib.
Komitə sədri vurğulayıb ki, Almaniya da Azərbaycanı Cənubi Qafqazda vacib bir tərəfdaş kimi qəbul edir, onun regiondakı liderlik mövqeyini, sülhə, əminamanlığa dəstək verməsini qiymətləndirir, dövlətimizin suverenliyini və ərazi bütövlüyünü dəstəkləyir.
“Azərbaycan Prezidenti cənab İlham Əliyevin və Almaniya Prezidenti Frank – Valter Ştaynmayerin mətbuata bəyanatlarında iki ölkə arasında əlaqələrin möhkəmləndirilməsinə böyük önəm verilmiş, münasibətlərin daha da yaxşılaşdırılmasının vacibliyi qeyd edilmişdir. Rusiyadan qaz təchizatı dayandığı zaman Azərbaycanın Almaniyaya kömək göstərməsi, infrastrukturun genişləndirilməsi sahəsində atılan addımlar, ticarət əlaqələrinin genişləndirilməsi barədə fikirlərini bildirən və buna görə Azərbaycan Prezidentinə təşəkkürünü ifadə edən, ölkəmizdə baş verən dəyişiklikləri yüksək qiymətləndirən Almaniya Prezidenti bildirmişdir ki, Azərbaycan inkişaf edərək mühüm məkana çevrilib və buradan olduqca vacib ticarət yolları keçir, öz növbəsində həmin amil dünyanın birləşməsinə əsas ola bilər.
Azərbaycandan keçən yollar əlbəttə dünya əhəmiyyətlidir. Qeyd edildiyi kimi, ölkəmizdən keçən yollar, eləcədə Orta dəhlizin rolu alman iqtisadiyyatı üçün çox vacibdir və bu qeyd edildiyi kimi, yaxşı perspektivdir. Azərbaycan Prezidenti cənab İlham Əliyev öz çıxışında iqtisadi–ticari əlaqələrinin möhkəmləndirilməsi ilə bərabər, Ermənistanın işğalçılıq siyasətini bir daha diqqət mərkəzinə çəkmiş və sülh müqaviləsinin tezliklə imzalanmasının vacibliyini qeyd etmişdir.
Almaniya Prezidenti dövlətimizin rəhbərinin sülh təşəbbüsünə tərəfdar olduğunu bildirərək qeyd etmişdir ki, bu sülh prosesinin çox böyük əhəmiyyəti var. Son bir il ərzində çox böyük addımlar atılıb, çox böyük irəliləyişlər olub. Almaniya Prezidentinin Azərbaycana səfəri ölkələr arasında əlaqələrin inkişafında yeni bir mərhələdir, dövlətlərin milli maraqlarına uyğundur və gələcək uğurlara təkan verəcəkdir”, deyə Tahir Rzayev bildirib.
