“Faktiki olaraq Ermənistanın hərbi-siyasi rəhbərliyi ikibaşlı oyun oynayır”. Bunu SİA-ya Milli Məclisin deputatı Elman Nəsirov deyib.
O bildirib ki, Ermənistanın hərbi-siyasi rəhbərliyi bir- birinə zidd iki prosesi həyata keçirməkdədi və ikisinin də müəllifi Ermənistandır: “Birinci proses onunla bağlıdır ki, o özünü sülhpərvər göyərçin kimi təqdim edir və sülhə hazır olduğunun bir fonunu yaradır. Hətta 17 bəndlik sülh müqaviləsinin bütün bəndləri üzrə razılaşmanın olduğunu vurğulayır və sülh müqaviləsi imzalamağa hazır olduğunu bildirir. Bu çox müsbət bir davranışdır və bu davranış əməli addımlarla təsdiqini tapsa regiona dayanıqlı sülh gələ bilər. Eyni məharətlə sülhpərvər obrazını alt-üst edə biləcək digər addımlarda atır. Çox intensiv şəkildə hücum silahları əldə edir. O silahlar öldürücü-dağıdıcı gücə malikdir. Bu silahları da ən çox Fransa Ermənistana ötürür. Sülhdən danışan son dərəcə iri addımlarla müharibəyə hazırlaşır. Bu reallıqlar fonunda Azərbaycanla atəşkəsi pozur. Tez- tez intensiv olaraq pozma hallarına imza atır və bununla da sülhpərvər davranışını tamam alt-üst edən yanaşma ortaya qoyur. Bu halda hansı sülhdən söhbət gedə bilər? Eyni zamanda Azərbaycan Prezidenti cənab İlham Əliyev Almaniya prezidenti Frank- Walter Steinmer ilə görüşündə mətbuat içində verdiyi açıqlamada qeyd etdi ki biz sülh müqaviləsi imzalamaya hazırıq”.
Onun sözlərinə görə, bütün bəndlər üzrə razılaşma var lakin bizim iki tələbimiz hələ də Ermənistan tərəfindən qulaqardına vurulur və yerinə yetirilmir: “Bunlardan biri ATƏT-in Minsk Qrupunun buraxılması ilə bağlıdır. O Minsk Qrupu ki öz misiyasını yerinə yetirə bilmədi. Bunu Azərbaycan həyata keçirdi. Bu gün Azərbaycan- Ermənistan münaqişəsi yoxdu və yoxdursa bu quruma nə ehtiyac var? O de-fakto leğv edilməlidir. Lakin Ermənistan hələ ki bu addımı atmır. Eyni zamanda cənab Prezident İlham Əliyev Almaniya prezidenti ilə görüşündə qeyd etdi ki, biz necə sülh müqaviləsi imzalayaq ki, hələ də Ermənistanın bizə qarşı ərazi iddiaları var. Bir yandan Qarabağ Azərbyacandır deyir, bir yandan buna zidd addımlar atır. Cənab Prezident həmçinin vurğuladı ki, Ermənistan bu tələblərimizi qəbul etsə sülh üçün heç bir mane ortada qalmayacaq”.
