“Daşınmaz əmlak bazarında qiymətlər, xüsusilə də mənzillərin qiyməti artıb”. Bu sözləri SİA-ya açıqlamasında Daşınmaz əmlak məsələləri üzrə ekspert Ramil Qasımzadə deyib.
O bildirib ki, bu artım kirayə bazarının qiymətlərinə də təsirsiz ötüşmür: “Bəzi vətəndaşlar biznes üçün yol seçiblər. Elə mənzillər var ki, onları alıb kirayə verirlər. Bu zaman da vətəndaşlar bank faizləri ilə uyğunlaşma aparırlar. Məsələn, bu gün bank faizləri ortalama 5%-dən yuxarı, 8, hətta 10% aralığındadır. Bu, o deməkdir ki, yüz min manata daşınmaz əmlak alan şəxs ən azı oradan illik olaraq 10 min manat gəlir götürmək istəyir. 100 min manat civarında olan mənzillərin kirayə qiyməti ortalama 500 manat təşkil edir. Bu da o deməkdir ki, təxminən 6 min manat gəlir əldə olunur. Bu səbəbdən mənzillərin qiymətinin artması, hətta bir otaqlı mənzillərin belə 100 min manatı keçməsi kirayə verənləri də sövq edir ki, kirayə qiymətlərini dəyisdirsin.
Daşınmaz əmlakın qiymətinin artımı kirayə bazarının qiymətinə də təsir edir. İkinci məsələ odur ki, tədricən ucuz mənzillər bazardan çıxmaq üzrədir. Köhnə tikili olan binaların sökülməsi, onun yerində yeni çoxmənzilli binaların inşa olunması bazara daha bahalı olan mənzillərin təklif olunmasıdır. Məlum olduğu kimi köhnə tikililərlə müqayisədə yeni tikililərin qiymətləri bazar dəyərinə uyğun olaraq daha bahadır. Təxminən köhnə tikililərdə qiymətlər birotaqlı üçün təxminən 400 manat təşkil edirsə, yeni tikililərdə bu qiymət minimum 500 manatdan yuxarı təklif olunur. İkinci səbəb odur ki, tədricən bazardan ucuz mənzillərin çıxması və yerinə daha bahalı mənzillərin gəlməsidir.
Üçüncü əsas səbəblərdən biri də budur ki, vətəndaşların da gəlirləri artmağa başlayır. Əmək haqqlarında da dəyişikliklər olunur. Bu, daşınmaz əmlak bazarına, xüsusilə də, kirayə bazarına təsirsiz ötüşmür. Bu da qiymətlərin artmasına səbəb olur.
Dördüncü və ən əsas faktorlardan biri də tələbin təklifi üstələməsidir. Yəni bu gün kirayəyə olan tələb təklifi bir neçə dəfə üstələyir. İki-üç dəfə bu gün tələb daha yüksəkdir. Bu səbəbdən də təklif az olduğu üçün tələb isə çox olduğu üçün qiymətlər artmaqda davam edir”.
