“Almaniya Federativ Respublikasının prezidenti Azərbaycana səfərə gəlib”. Bu sözləri SİA-ya açıqlamasında Milli Məclisin deputatı Anar İsgəndərov deyib.
Onun sözlərinə görə, Azərbaycana gəlməmişdən əvvəl isə Ermənistanda oldu: “Əslində Azərbaycana olan münasibətini bildirdi. Qərb, o cümlədən Almaniya Almaniya Federativ Respublikasının prezidentinin simasında göstərdi ki, ermənilərin göz yaşına inanır və Ermənistanı müdafiə etmək üçün əlindən gələn böhtanları atır. Gah tarixdə olmayan Qarabağ qurumunun bayrağını qaldırır, gah ermənilərə qarşı etnik təmizləmədən danışır. Ancaq Almaniyanın prezidenti əsl həqiqəti öyrənmək istəsə idi, həqiqət onun üçün maraqlı olsaydı, onda bir neçə suala cavab axtarardı.
30 il ərzində Almaniya harada idi? 30 il ərzində Azərbaycanın torpaqlarını işğal edən Ermənistana “dayan, insanlara qarşı soyqırımı keçirmək olmaz, Qərbi Azərbaycanda yüz minlərlə azərbaycanlını dədə-baba torpaqlarından qovmaq olmaz” deyib? Deməyib. Ona görə də, Almaniya prezidentinin Azərbaycana səfəri Almaniyanın böyüklüyünü yox, Azərbaycanın qazandığı uğurları göstərir ki, Almaniya rəhbəri məcbur olub Azərbaycana gəlib. Doğrudur, Almaniya öz səhvini başa düşdü, üzr istədi. Ancaq sualı belə qoysaq, daha maraqlı olar. Almaniya bunu bilərəkdən etdi, yoxsa bilməyərəkdən etdi? Hansı formada olursa-olsun Almaniyaya nüfuz gətirmir. Əgər Almaniya əsl həqiqəti bilmirsə, Qərb dövləti kimi, böyük dövlət kimi ona baş ucalığı gətirmir. Eyni zamanda Azərbaycan-Ermənistan münasibətlərində maraqlıdırsa, sülh müqaviləsinin tərəfdarıdırsa, Almaniya bu hərəkəti etməməlidir. Problemi daha dərindən öyrənməlidir ki, Azərbaycana səfəri ərəfəsində bu boyda ağrılı hərəkətə yol verməzdi. Ancaq bütün bunlar həm də onu deməyə əsas verir ki, təkcə Almaniya yox, Fransanın da, digər dövlət rəhbərləri də Azərbaycana gəlsin, Azərbaycanın uğurunu görsün, dalğalanan üçrəngli bayrağa baxsın, dərk edib bilsin ki, bu xalq Ali Baş Komandan ətrafında “dəmir yumruq” kimi birləşib.
Azərbaycanın suverenliyi, ərazi bütövlüyü əbədidir. Bu uğuru Azərbaycanın əlindən heç kim ala bilməz. Amma xalq olaraq qonaqpərvər xalq olduğumuz üçün Azərbaycana kim gəlirsə, biz xalqımızın adət-ənənələrinə uyğun onları qəbul edib, böyüklüyümüzü göstərməyə çalışırıq”.
