“İstəkdən kənar insanın ağlına gələn, narahatedici düşüncələr obsessiv kompulsiv pozuntu hesab edilir”. Bu sözləri SİA-ya açıqlamasında uşaq, yeniyetmə və yetkin psixoloqu Nigar Ağabağırova deyib.
Psixoloqun sözlərinə görə, obsessiv, yəni təkrarlanan narahatedici düşüncələr gərəksiz olsa da, həmin şəxs çox zaman bunun məntiqsiz oldugunun fərqində olur: “Yəni bu vəziyyət keçmiş adı ilə desək, nevrozdur. Psixoz isə odur ki, insan reallıqla qeyri-reallığı ayırd edə bilmir. Psixozda müxtəlif növ hallüsinasiyalar, yəni qarabasmalar da görülə bilir.
Obsessiyalar təşviş pozuntusu sinfinə aiddir. Hansısa təhlükəli vəziyyət zamanı bizdə olan həyəcan təşviş normaldır. Yəni var olan təhlükəyə həyəcanlı reaksiyamız təbii haldır. Lakin heç bir təhlükə olmadan, səbəbsiz olaraq vurma, kəsmə, zərər vermə düşüncələri ağlımıza gəlirsə, bu təşviş bizi narahat edərək, həyat keyfiyyətimizi aşağı sala bilər.
Bu narahatedici düşüncələr nədən qaynaqlanır?
Çox zaman genetik olur. Ailədə təşviş pozuntularının hər hansısa birindən əziyyət çəkən kimsə varsa, digər ailə üzvlərində də görülmə ehtimalı olur. Eyni zamanda yüksək dərin düşünən, hər şeyi kontrola almaq istəyən mükəmməliyyətçi insanlarda daha çox görülür.
Müalicəsi mümkündür. Koqnitiv bihevioral terapiya və lazım gəldikdə antidepressantlarla müalicə etmək mümkündür”.
