Day: March 23, 2025

ABŞ rəhbərliyinin nümayəndələri hələ ki, Ukraynaya silah tədarükünün məhdudlaşdırılmasına razılıq verməyiblər. SİA “Bloomberg”ə istinadən xəbər verir ki, Kiyevə silah tədarükünün azaldılması Rusiya tərəfinin atəşkəs üçün şərtlərindən biri idi. Lakin Ağ Ev hələlik bu məsələ ilə bağlı qərar verməyib. “Ağ Ev əvvəllər Ukraynaya yardımını dayandırmışdı. Lakin hazırda ABŞ heç bir məhdudiyyətlə razılaşmayıb”, – agentlik yazır. Xatırladaq ki, ABŞ Prezidenti Donald Tramp martın əvvəlində Vaşinqtonun Kiyevə kəşfiyyat məlumatlarının verilməsini bərpa etdiyini və hazırda Rusiya məhsullarına əlavə rüsumların tətbiqi, həmçinin Rusiyaya qarşı sanksiyaların sərtləşdirilməsi imkanlarını nəzərdən keçirdiyini bildirib.

Daha çox

Ermənistanın Baş naziri Nikol Paşinyan Gürcüstana səfər edib. SİA xəbər verir ki, Gürcüstanın Baş naziri İrakli Kobaxidze Paşinyanla görüşü barədə “X” hesabında məlumat yayıb. Məlumata görə, onlar görüşdə iki ölkə arasında strateji tərəfdaşlıq və ikitərəfli münasibətlərin pozitiv inkişaf dinamikasını müzakirə ediblər. Kobaxidze Paşinyanla birgə Gürcüstan və Ermənistanın milli yığmaları arasında Tbilisidə keçiriləcək futbol matçını izləyəcəklərini qeyd edib.

Daha çox

Fevralın 14-də xəstəxanaya yerləşdirilən Papa Fransisk son beş həftədən sonra ilk dəfə dindarların qarşısına çıxıb. SİA-nın xəbərinə görə, o, ənənəvi bazar günü xeyir-dua vermək üçün Romadakı Aqostino Gemelli xəstəxanasının pəncərələrindən birinin eyvanına çıxıb və bundan sonra tibb müəssisəsindən buraxılıb. Xəstəxananın qarşısına yüzlərlə adam toplaşıb. İntensiv oksigen terapiyası alan Papa zəif səslə “Hamınıza təşəkkür edirəm” deyib. O, iqamətgahı olan Vatikanın Müqəddəs Marta otelində, xüsusən də səsini bərpa etmək üçün əlavə müalicə alacaq. Onun fəaliyyəti əhəmiyyətli dərəcədə məhdudlaşdırılıb.

Daha çox

Polşa Belarusla sərhədi möhkəmləndirmək üçün əlavə qoşun cəlb edəcək. SİA xəbər verir ki, bu barədə Polşa daxili işlər naziri Tomaş Semonyak “X” sosial şəbəkəsindəki səhifəsində bildirib. O, sərhədə daha 1500 hərbçinin göndəriləcəyini qeyd edib. Nazir tezliklə sərhəd boyu asfalt yolun salınması işlərinə başlanacağını da söyləyib. Semonyak əlavə edib ki, bunun üçün bu il 500 işçi işə götürməyi planlaşdırırlar. Bundan əvvəl nazir Polşanın Rusiya və Belarusla sərhədlərini möhkəmləndirmək üçün Avropa Komissiyasından 50 milyon avrodan çox vəsait alacağını açıqlamışdı.

Daha çox